Novas

Acompañando a Elvira Cienfuegos, na presentación desta conferencia estiveron hoxe de mañá Iván de Andrés, responsábel de Cultura do COAG-Santiago e Jorge Duarte, presidente da delegación.

Para a edil nacionalista “é indubidábel que na arquitectura a preocupación pola sustentabilidade foi claramente en aumento nos últimos tempos o que veu dando froitos relevantes como o uso de novos materiais ou o aumento da eficiencia no uso de enerxías renovábeis nas novas construcións” é por iso que “non é de estrañar que un bo número de arquitectos, especialmente aos que traballan no urbanismo ou no paisaxismo, se interesen pola auga e a súa xestión. Porque a auga, un recurso limitado, é indispensable para todas as formas de vida, contribúe a conformar paisaxes, é necesaria para a conservación de ecosistemas sans e tamén para o benestar humano”.

Elvira Cienfuegos quixo lembrar que “o nacemento e a evolución de Santiago de Compostela non pode explicarse sen mencionar a auga. A auga dos seus ríos, que serviu para regar as hortas, para lavar a roupa, para moer os cereais ou para a industria do curtido. A auga das súas fontes e manantiais, que daban de beber á veciñanza e visitantes. A auga, que hoxe axuda a conformar os espazos verdes públicos, os parques e xardíns que contribúen a calidade ambiental e a calidade de vida dos seus habitantes” engadindo que “a auga é un recurso insubstituíbel que hai que xestionar sabiamente. A auga é o gran patrimonio de Compostela e sen dúbida só cunha xestión acaída dela podemos avanzar no camiño da sustentabilidade”. 

Este ciclo de conferencias únese á iniciativa da Estratexia Verde para Compostela que se está a impulsar desde a Concellaría co apoio do Consorcio de Santiago.

A auga de Compostela

A conferencia será mañá, xoves 24, ás 20 h. no CGAC e estará presentada polo arquitecto Albert Cuchi, profesor da UPC e director-coordenador da equipa de traballo elaborador dunha Estratexia Verde para Compostela que introducirá o tema e a conferencia que impartirá Pietro Laureano, laureado arquitecto urbanista italiano experto tamén en temas de auga. 

Pietro Lauréano, é profesor de Historia da cidade e do territorio na Facultade de Arquitectura do Politécnico de Bari (Italia). É membro do consello directivo  do comité italiano do ICOMOS, consultor da UNESCO e experto en zonas áridas, na civilización islámica e nos ecosistemas en perigo. Realizou misións en Sana’a e en Shibam (Iemen), en Tipasa (Alxeria) e en Petra (Xordania).En palabras de Iván de Andrés “teremos a oportunidade de escoitar a unha das máximas autoridades, nesta temática, do panorama internacional”. 

Unha ocasión para a reflexión e para a toma de decisións sobre a xestión da auga en Compostela. Unha conferencia de especial interese nun momento no que se está a reflexionar sobre o desenvolvimento do Plan especial dun entorno tan dependente da auga como son as Brañas do Sar.