Novas
Santiago conta con unha ampla rede de ríos e regatos que compre ter limpos retirando das beiras e do cauce residuos de todo tipo. Aínda que a mellor ferramenta para ter o nosos ríos limpos e concienciar á cidadanía para manter actitudes e comportamentos responsábeis, de non tirar ao río restos, de non deixalos no medio porque poden acabar no río. Compre lembrar que materiais como os plásticos duran varios anos sen descompoñerse.
Neste marco Medio Ambiente de Santiago colabora coa campaña Tes unhas botas na casa? na limpeza do río Sar que Adega organizará o próximo domingo. O inicio da actividade será ás 11 horas na Ponte sobre o Sar, a carón das piscinas, e para participar pode contactarse nos teléfonos de Adega 981570099 e 619672038 ou mesmo a través do correo-e escribindo a adega@adega.info
Tes unhas botas na casa?
Despois do éxito da primeira xornada de limpeza en ríos en 2008 Adega repite a experiencia este domingo 27 de setembro. A limpeza desenvolverase en colaboración con Concellos e distintas entidades e asociacións de Galiza e pretende chamar a atención sobre os problemas máis agravantes que sofren os nosos ríos que segue a ser a cantidade de lixo que aparece nos cauces e ribeiras. Plásticos e entullos son elementos case habituais nos cursos fluviais. Dende Adega e o Concello de Santiago quérese concienciar á sociedade da necesidade de manter limpos os nosos ríos como premisa para a conservación da súa saúde.
A limpeza non pasa só por ser unha actividade dun día. Para a conservación dos ecosistemas fluviais cómpre desenvolver actitudes responsábeis cara o medio natural e depende de todos/as frear a contaminación que están a sufrir. Adega entregará aos grupos participantes un protocolo 2009 para difundir a limpeza ecolóxica e respectuosa dos ecosistemas fluviais.
O pasado ano, en toda Galiza, estimouse que o peso total do material retirado era dunhas 11.020 toneladas de lixo cunha orixe moi diversa: neveiras, rodas, radiografías, colchóns... Neste ano animase a todos os e as participantes a pesar o lixo retirado e difundir entre o resto da sociedade a idea de que o río non é un vertedoiro.
