Novas
Axenda 21 Local: Plan de Acción
O Plan de Acción é un Programa de Actuación Municipal definido a curto, medio e longo prazo co obxectivo de que o Concello camiñe cara a sustentabilidade local.
Unha vez coñecidos os resultados do diagnóstico final (debilidades, fortalezas,...), é necesario planificar a actuación municipal baseándose nuns obxectivos e liñas estratéxicas definidas e nuns sistemas de prioridade.
O Plan de Acción estrutúrase do seguinte xeito:
- Liñas estratéxicas: grandes eixos previsíbeis para a mellora ambiental local e a progresión cara a un modelo de desenvolvemento sustentábel.
- Programas de actuación: agrupados en cada liña estratéxica, responden aos diversos obxectivos que pretende acadar a primeira.
- Proxecto: reflicten as actuacións concretas que é necesario realizar para acadar o obxectivo de cada Programa de Actuación.
Obxectivo central
A sustentabilidde do concello de Santiago defínese por un obxectivo central, que sintetiza as características fundamentais e singulares da zona como modelo de desenvolvemento sustentábel no futuro, e por un conxunto de liñas estratéxicas que enuncian o sentido integrador de cada unha das agrupacións básicas de proxectos ou accións estratéxicas que permitirán acadar o devandito obxectivo central.
Defínese o obxectivo central como aquel marco cara onde se pretende dirixir o sentido do desenvolvemento sustentábel do concello. Neste caso o obxectivo que mellor representa este escenario é:
Consolidar Santiago a partir da súa diversificación socioeconómica, compatíbel coa calidade do medio ambiente e a sustentabilidade dos seus recursos, xunto cunha mellora das súas infraestruturas e servizos que permita mellorar a calidade de vida dos seus habitantes e o seu papel como eixo vertebrador das poboacións do seu contorno e como capital de Galicia.
Para a consecución do obxectivo central proposto, identificamos tres liñas estratéxicas:
- Garantir a calidade e cantidade dos servizos ambientais municipais, redución da contaminación e promoción do aforro e eficiencia no uso de recursos.
- Turismo sustentábel e diversificación económica baseada nos recursos propios e mellora da cualificación empresarial e investidora.
- Planificación territorial e mobilidade sustentábel no medio urbano e rural.
