Plan de Prevención de Incendios forestais

O Plan de Prevención de Incendios Forestais (PPIF) de Santiago deriva da Lei 3/2007 de prevención e defensa contra os incendios forestais de Galiza,  Lei que ten o obxectivo de potenciar e mellorar a eficiencia da loita contra os incendios forestais e que estrutura o planeamento da defensa en varios niveis: galego, de distrito, municipal e inframunicipal O Plan Municipal é un documento valioso porque  define medios, procedementos e actuacións de cara a súa aplicación para a mellora da loita preventiva e de defensa contra os incendios forestais en Santiago.

A Consellería de Medio Rural da Xunta posibilitou o establecemento de convenios cos concellos interesados en elaborar no 2009 un Plan municipal de Prevención, a integrar no Plan de Distrito. Neste contexto o Concello de Santiago asinou o convenio, en virtude do cal a Consellaría achega 5.000 euros dun custe total de 11.500 euros. Proserga foi a empresa encargada de redactar o  plano que abrangue 220,60 Km2 de Santiago con 269 núcleos de poboación; un ámbito amplo, delicado e complexo en relación a outros concellos de Galiza, e que ademais está considerado Zona de alto risco de incendio,segundo Orde de abril de 2007.

De carácter trianual, este plan integrarase no Plan de emerxencias municipal, e terá como obxectivo caracterizar o concello e identificar, estruturar, clasificar e organizar os seus medios, accións e obxectivos de acordo co Plan de Incendios galego. O documento completase con un conxunto de mapas a escala 1:25.000 e varios anexos con datos de climatoloxía, fauna, espazos e especies protexidas, características da rede viaria forestal, hidroloxía, formularios, datos de incendios en Compostela nos últimos ano, etc. .

Datos

No documento enuméranse todos os núcleos agrupados por parroquias detallando os condicionantes do medio natural como as características orográficas, a climatoloxía, a hidroloxía, a vexetación ou a fauna. Esta relación vai acompañada dunha síntese dos condicionantes socioeconómicos, no que se mostran datos da evolución da poboación e da súa ocupación por sectores.

O ámbito forestal en Santiago representa o 52,7 por cento da superficie do municipio con un total de 11.615 hectáreas. Entre as parroquias que teñen máis superficie forestal destacan a da Sabugueira con 1.603 hectáreas que supón case un 60 por cento do seu territorio, ou a de San Xoán de Fecha, con 1.530 hectáreas equivalente a un 73,5 por cento da súa superficie. Practicamente, a totalidade do monte é de propiedade privada, cunha superficie media de 2.341 m2 por parcela.

O documento recolle os datos relativos aos incendios no período 1999-2008 no que se rexistraron en Santiago 749 incendios, que se corresponde a unha media de 75 incendios por ano, e unha superficie queimada de 136,39 hectáreas ao ano e cunha área media de 1,82 hectáreas queimadas por incendio. Hai que destacar os datos do bienio 2007- 2008 cando diminúen considerablemente os lumes, con vinte e doce incendios, respectivamente. A  pauta no referido ao número de incendios no período analizado é semellante a do conxunto do distrito, se ben en  Santiago o número é lixeiramente menor no ano 2004 e maior no 2006.

A prevención e a extinción de incendios: medios, procedementos e actuacións

Como puntos potencialmente perigosos identifícanse as gasolineiras, depósitos de produtos inflamábeis ou areas recreativas, entre outros;  identíficanse tamén os puntos onde se pode proceder á captación de auga en caso de incendio. Tamén se determinan as zonas de actuación preventiva ( protección de núcleos, rede viaria,...)ou zonas de xestión da biomasa;  destaca a gran lonxitude da rede viaria de Santiago, que é de máis de 1.186 km, dos que 671, en asfalto ou terra, están en superficie forestal.

No Plano analizase a dificultade de extinción de incendios en función dun índice de aplicación xeral que adopta valores entre 1 e 38;  é o resultado de combinar índices de pendente, exposición, combustible e densidade de infraestruturas. Segundo esta escala, un 77 por cento tería un valor por debaixo do 10, un 20 por cento dos incendios situaríanse entre o 10 e o 20, e un 1,5 por cento estaría nun nivel superior a 20.

En función dos datos analizados, o plano estabelece prioridades nas actuacións de prevención, tanto sobre o territorio como sobre a poboación. Recóllese nun mapa a prioridade das actuacións por parroquias.

Tamén se describen os medios dispoñíbeis, as infraestruturas de vixía, os medios de prevención e extinción e os procedementos operativos no caso de incendios.

Finalmente o Plan complétase coas normas de regulación de aproveitamentos e usos que poidan provocar lumes forestais: normas para queimas, para festas, para o acceso e circulación por zonas forestais en función do risco de incendio, etc.

Máis información

Plan Municipal de Prevención e Defensa contra os Incendios Forestais do Concello de Santiago de Compostela. Descargar (pdf, 8.806 Kb).